(Oromedia, 9 Sadaasa 2011) የመሬት አሰጣጥ ሥርዓት፣ ሕግ፣ ደንብና መመርያ በመተላለፍ በክልሉ ላይ ከፍተኛ ጉዳት አድርሰዋል በሚል ክስ ተመሥርቶባቸው የነበሩት ከ50 በላይ የሚሆኑ በኦሮሚያ ክልል የሚገኙ ባለሥልጣናት በትናንትናው ዕለት ጥፋተኛ ተባሉ፡፡

የሰበታ ከተማ ከንቲባንና መሬትን ሸንሽነው የሚያስረክቡ መሀንዲሶች፣ ደላሎችና በተለያዩ ኃላፊነቶች ላይ የሚገኙ ተከሳሾችን ጉዳይ ሲመረምር የቆየው የኦሮሚያ ልዩ ዞን ከፍተኛ ፍርድ ቤት፣ በትናንትናው ዕለት ጥፋተኛ ያላቸውን ተከሳሾች በ20 የክስ መዝገቦች ክስ አቅርቦባቸዋል፡፡

የልዩ ዞኑ ፍርድ ቤት በጉዳዩ ላይ ትኩረት በመስጠት ለዓመታት ጊዜ ሊወስድ ይችል የነበረውን የክስ ሒደት ግልጽ በሆነና በከሳሽ ዓቃቤ ሕግና በተከሳሾቹ መካከል በተደረገው ክርክር፣ ተከሳሾቹ ‹‹በቃን›› እስከሚሉ ድረስ ልዩ መብት ተሰጥቷቸው የሠሩት ጥፋት በሰውና በሰነድ ማስረጃ በመረጋገጡ ጥፋተኛ እንዳላቸው ታውቋል፡፡

ውሳኔው ጥራት ባለው መረጃና ማስረጃ የታገዘ እንዲሆን፣ የዞኑ ልዩ ፍርድ ቤት ዘመኑ ባመጣቸው ዲጂታል የኤሌክትሮኒክስ መቅረጫዎች የእያንዳንዱን ተከሳሽ ሐሳብ፣ አስተያየትና መግለጫ በመቅረጽ፣ ከዓቃቤ ሕግ ማስረጃና ከሕጉ ጋር በማገናዘብ ግልጽ የሆነ ክርክር እንዲካሄድ ተደርጎ፣ የጥፋተኛነት ውሳኔው ተላልፏል፡፡

ፍርድ ቤቱ ከሕግ ውጭ መሬት የሰጡ፣ የሸጡና በመንግሥት ላይ ከፍተኛ የሆነ ጉዳት አድርሰዋል ባላቸውና ጥፋተኛ በተባሉት ተከሳሾች ላይ ዛሬ የቅጣት ውሳኔ ያስተላልፋል ተብሎ ይጠበቃል፡፡

Advertisements