DHUGAA
By Sara Gonfa
Namuu si abdatee karaa kee filatee
Bakka deemu hundatti waa’ee kee dubbatee
Dhugaan yoo qaldhates hin cittuun dhaadatee
Turtullee ni mul’atiin boriif si abdatee
Hanga yoomi diddaa yeroon hoo fagaatee ?
Kan si heegata jiru marti hoo abdii kutatee
Lakkii ni gaabitaa ofii balleesitee.
Mee dhugaa dubbadhu afaan kee saaqqadhu
Haqa jiru baasuuf sagalee ciradhu
Dalagaa kee mara xiinxalii hubadhu
Tarii yoo dagattes mee lakkii yaadadhu
Abbaan haqaa eenyuu? jedhii of gaafadhu
Iddoo itti dhokatte bakka jirtu himadhu.
Mataa kee dabsattee ykn aguuggattee
Bifa kee bareeda kijibaan faalamtee
Osoo lubbuun jirtuu jiraa awwaalamtee
Bullukkoo kabajaa sobaan soqolamte
Sobinni kabajamee ati ofii sal-phattee
Karaa qajeelaa irra adeemuu dhorkamtee
Daandii isa jajallaa waliin jajallattee
warra si hukkaamsetti maaf harka keennattee ?
Boolla itti dhokatte maal yoo bantee baate ?
Biyyoo si irra tuulan maal yoo of irraa haate?
Takka wixxirfattee humna kee fixattee ?
Tarii akka hin dubbannetti arrabaa muramittee?
Moo ati kijiba waliin michummaa huummatte?
Ykn intala fuutee isaaf soddaa taate?
Mee lakkii hin dhoksinii him waan rakkatte
Qoricha argattaa yoo rakkoo kee himatte
kan si hudhe qabdee yoo harka keetiin huute
Boolla siif qotetti yoo qabdee darbatte .
Warra siihin boonuuf abdii guddaa taata
Ka cubbuu irra adeemus daandii kee qabata
Akkuma odaa nabee sumatti irreenfata
Harka isaa isa cubbuu qulleesee dhiqata
Kabajaa siif qabus ifatti dubbata.
16. 05. 11
Obboleewwan yaa qoppheessitoota mandhee tanaa,
Waan hundaa dura dhaamsi kiyya kan obbolummaa isin haa dhaqqabu!
Kunoo, ani ammuman mandhee teessan keessaa bakka kana banee, walaloo bareeddaa: “DHUGAA” jedhamu shaduu (dubbisuu) dandaye. Ani hedduun itti-gammade. Walaleessaa kanaaf barreesseen, gammachuu kiyyaa fi sagalee jajjabeessoo ergaaf jedheen, garuu maqaa walaleessichaa arguu daddhabe. Maaf maqaan abbaa walaloo kanaa hin kennamne? Egaa, kabajaanan deebii keessan eeggaddha!
Kabaja cimaa wajjin!
Taammanaa Bitimaa
Obbolee Taammanaa,
Nagaan Waaqaa isin haa dhaqqabu! Dhugaa keessan; abbaan walaloo kanaa maqaan hin keewwamne; sun yeroo maxxanfamu dagatame. Ammoo amma sirreessinee jirra.