Afaan koo dureessa, afaan koo bareedaa
Ittiinan bookkisaa, ittiinann baroodaa
Eyyee…ittiinan xirqana akka korma didaa
Waawuu;… ittiinan garmaama, akka sangaa fardaa
Utubaa aadaa koo dugugguruu dugdaa
Afaan Haadha koo tii aayya afaan hundaa!
Afaan Abbaa koo tii abbayya afaan hundaa!
Afaan warra kootii, afaan saba guddaa!
Lakkii,… nan dhaadadhaa, waawuu, nan gammadaa
Maafaan taa’ee gomm’aa?…maafan taa’ee gaddaa?
Mee afaan koon faarsa, mee afaan koon saada.
Afaan warra arbaa, afaan warra leencaa, afaan goodaa Baqqoo
Afaan warra barii, afaan iyya ’Bboroo, afaan iyya ’ndaanqoo
Afaan koo afaan barii, afaan koo ganamaa
Afaan koo mi’aawaa afaan nadhii dammaa!
Afaan bultee Waaqaa, bultee isa jalqabaa
Afaan akka kan koo eenyu abbaasheetu qabaa?
Afaan koo gaachana
Ittiin dhukubsadheen ittiin of waldhaana
Ittiinan bashannana
Ittinan fakkana
Ittinan xirqana
Eeyyee..yoon fedhe ittiina caraana.
Afaan koo bakara
Ittiinan geerara
Ittiinan daraara
Ittinan wal hora.
Ittinan wal bulcha.
Ittinan mucaa dhalacha
Dalcheen ittiin guddisa
Guddiseen muldhisa.
Ittinan arama, ittiinan sassaaba
Ittiinan jaalladha, ittinan nama jibba
Ittinan dadhaba
Ittiinan gaggaba
Ittiin of kuffiseen ittiin ol of qaba.
Ittinan nama lola
Ittinan walii-gala
Ittiinan waa mala
Ittiinan of dhaala.
Ittiin quruphiseen, ittinan burraaqa
Ittinan waraaba, ittinan gadi naqa
Ittiinan socho’a, ittiinan warraaqa
Ittiin lafa qoteen, ittiinan babbaqa.
Qilleensan konkonaa, qilleensan gaadi’a
Gubaa mana Waaqa asi ol ittiin ba’aa
Bakka fedhen deema
Galaanan dhidhima
Icciti boroo Waaq baree ittiin baannadha
Gadameessa Haadha Margoo ittiin dhageefadha
Ittiin ciraa cireen, ittinan bajjii qota
Ittiinan hojjedhaa, ittiinan boqota
Kan baden ittiin soqa
Qaalluun ittiin dhaqa
Ittiinan dalaga
Ittianan taa’ee muga
Yoon fedhe… ka’een ittiin fiiga
Ittiin qalbii horeen, ittiinan wajaga
Ittinan jeekkara, fedhe ittiinan faga
Fedhe ittiinan qoosa, ittiinan munaaga
Eeyyee baga, baga, baga…. eeyyee baga
Maal naafisoo mirgaa!
Afaan koo dureessa
Ittiinan dubbisa,
Ittinann weeddisa
Ittiinan barreessa
Ittiin waa madaala
Ittinan of kuula
Ittiinan fooggala
Ittiinan walala.
Afaan kootiin jibbeen, afaan koon jaalladha
Afaan kootiin faarseen, afaan koon tuffadha
Gadda koo ittiin gaddeen, sirba koo sirbadha.
Bultee koo ganamaa, isaanan muuxadha
Ooltee koo isa guyyaa kunoo isan cuuphadha
Dhiyaana galgalaas, eyyee isan unadha.
Afaan koo afaan beekaa
Nan beeka! Nan beeka!
Icciti ergaa Waaq ittinan namaaf hiika
Ittinan mammaaka
Ittinan abaara, ittinan wal kaka
Eeyyee…yoon fedhe….ittiinan alaaka
Kan kana na dhorku hudduusaatti muka!
Zalaalam Abarra
30-12-2011
Helsinki / Finland
super!
aboo fayyaaaa dayi!
ittiinis geerari/guuli/heeddisii-ragadi/shubbisii-burraaqi!!
“yoom takkaa dhiira argite?” jedhe namtichi okkoteetti mishingaa naqee,bishaan itti hanqisee,jabaa doddotii jala shidee!
dhufaat jirra kunoo jedhiin warra namni wal qixxee ittin hin fakkaanne saniin.